أغنيات محدش سمعها غير لما اتغنت مرة تانية بمطرب تاني – أماني وأغاني

أغنيات بين البعث والأحياء.   كتير من المطربين لما بيحب يعيد تقديم أغنية قديمة بيختار دايما الأغاني المشهورة الناجحة، ممكن لحلاوة الأغنية أو استغلال لنجاحها السابق لكن عاوزين نتكلم عن بعض الأغاني اللي ما نجحتش في الاصدار الأول ليها ونالت شهرة كبيرة لما اعاد تقديمها مطرب تاني. مش هنحاول نبحث في أسباب فشل النسخ الأولى لكن هنحاول نرصد ونوثق الأغاني دي اللى بعض الجمهور ما كنش يعرف ان ليها اصدار سابق بل وبينسبوها بالكامل للمطرب اللى أعادها للحياة من تاني. أول أغنية معانا هي “وأنا أعمل ايه” واللى اتعادت بصوت هشام عباس.  الإصدار الأول من الأغنية كان بصوت المطرب مصطفى السقا في شريط “فينك” اللى محققش نجاح يذكر وعدم نجاح الشريط ساهم في عدم انتشارها كمان اختفاء مصطفى السقا نفسه اللى اعتزل الغنا بعد شريطه التاني “رزق العين” عشان يتفرغ للعمل الإعلامي.   منتج الأغنية “طارق الكاشف” كان شايف أنهاتستحق فرصة تانية فقرر أنه يعيد تقديمها بصوت المطرب الشاب “هشام عباس” واستعان بالموزع بهاء حسني اللى حط توزيع مختلف عن توزيع طارق مدكور اللى وزع أغنية مصطفى السقا، ما اكتفاش طارق الكاشف بكده، ده قرر أنه يسوق الأغنية كمزيكا بس قبل أما تنزل، وقدمها كتتر لأحد برامج المنوعات اللى بتنتجها وكالته الاعلانية. ولك أن تتخيل أن التتر ده هيسمعه الجمهور تلاتين مرة في رمضان يا ابن اللعيبة. نزلت الأغنية يوم وقفة عيد الفطر في شريط “تعالي” وحققت نجاح ضخم جدًا حطت هشام على سلم النجومية والشهرة. الاغنية دي ليها اصدار تالت بصوت الشاب خالد غناها في احد الأفلام الفرنسية لكن طبعا محققتش أي نجاح يمكن بسبب مخارج ألفاظ الشاب خالد اللى ما تألفتش مع طبيعة اللهجة المصرية. تاني أغنية هي دار الزمان بينا واللي اتعادت بصوت ايمان البحر درويش أول التسعينات، الأغنية إصدارها الأول كان في شريط اسمه “البنات” وغنتها المطربة أميرة المشهورة بأغنية “يا شمس غيبي” كتير ما يعرفوش أن أميرة أول حد قدمها كان يحيي خليل لما قرر أنه ينفصل عن شركة سونار ويعمل شركة أنتاج فني خاصة بيه ويقدم فيها بعض الأصوات الجديدة. بدأ خليل مشاريعة الانتاجية مع الملحن حمدي صديق في ألبوم عجبتيني لكن لما حصل انفصال بينهم زهق من التعاون مع المطربين وقرر أن يركز أكتر مع الأصوات النسائية فأنتج شريط سماه “البنات” اللي قدم فيه اصوات زي راندا واميرة وزينب ومها. ألبوم البنات ماصدفش أي نجاح ، ويمكن في قطاع عريض من الجمهور ماسمعشي عنه خالص، اختيار اميرة لأداء الأغنية دي كان سئ جدًا ومش متألف مع طبيعة صوتها كمان فكرة الأغنية اللي تليق أكتر على مطرب مش مطربة.  وده خلى الملحن جمال بشارة يقرر أنه يعيد تقديم اللحن من تاني بصوت ايمان البحر درويش في شريط شمس ودفا. الاغنية اشتهرت اكتر بصوت ايمان البحر درويش بل ان في ناس كتير ما تعرفش ان ليها اصدار سابق وطبعا الأغنية كانت احد اسباب القطيعة الفنية الى حصلت بين جمال بشارة وبين يحي خليل والأغنية دي بتوضح فشل خليل المتكرر في اختياراته عكس ما بيروج دايما. هنروح لمحمد محي وأغنية لالي اللي بيعتبرها جمهور محي واحدة من أحلى ما غني، الأغنية دي ظهرت لأول مرة في شريط “كده كده” للمطرب والملحن اسماعيل البلبيسي اللي الجمهور يعرفه بأغنية “انا م البداية يا غربة بتحمل  فضلت الأغنية دي في دماغ محي اللى كانت بتربطه علاقه قوية باسماعيل البلبيسي وقرر أنه يعيد تقديمها من تاني لكنه غير شوية فيها فشال الموال اللي في البداية وبدأ من المذهب علطول كمان ، الأغنية نزلت في شريط شارع الهوى واحد من أقيم ألبومات محي وساهم تصويرها وإخراجها الموسيقي في أنه اداها قوة وسحر وده خلاها تنجح وتشتهر أكتر من الإصدار الأول ليها. هنروح لأخر أغنية معانا وهي أغنية عيون اللى قدمها الملك محمد منير في ألبوم يا أهل العرب والطرب، كتير ما يعرفوش ان الأغنية دي ليها اصدار أول بصوت المطرب ماهر العطار ونزلت أواخر السبعينات من كلمات الشاعر  سيد حجاب ولحن وتوزيع “عمار الشريعي” الأغنية في اصدارها الأول ما علقش مع الجمهور كتير يمكن لأن الأغنية وقتها كانت بتعيش ثورة على الشكل الكلاسيكي التقليدي وماهر العطار كان محسوب على التيار الكلاسيكي القديم ده، برغم أن عمار الشريعي حاول أنه يغلفها بروح شبابية غربية في التوزيع لكنها أداء العطار كان ضعيف جدًا ومانجحتش وقتها. الأغنية دي بتكشف لنا عن تفكير منير في اعادة تقديم الأغاني القديمة لانه بيدور على أغاني قد تكون مجهولة بعض الشئ لأغلب المستمعين اللى علطول بيتزرع في عقله أنها أغنية منير من الأساس، ويمكن ده ذكاء كبير منه لانها لو نجحت هتنسب بالكامل ليه ولو فشلت فهي في النهاية مش أغنيته من الأساس.