سيد سلائون – ولاد الحرام

سيد سلائون
مواطن مصرى
كتير منكم ميعرفهوش… لا تقريبا محدش يعرفه من اساسه
وانا النهاردة جى اعرفكم بيه
الاسم سيد سلائون …. سيد دى عارفينها انما سلائون ده اسم شهرة جه من مهنة ابوه
والسلائون دى مادة بيدهنوا بيها الخشب وابوه انتحر بشرب كمية مهوله منها
حاجة كده تدهن خشبتين مسرح
السن فشلو فى تحديده ولما غلبوا قالوا معدى التلاتين
الاب متوفى والام شبه متوفيه
يعنى مش ميته لكن باقى فيها نفسين
المهنه ولا حاجة عاطل من ضمن العاطلين
حاسس بسؤال بيتنطط جواكم كلكم
طيب بتكلمنا عنه ليه
ماهو واحد زى الملايين اللى بيمشوا فى الشارع
ومحدش حاسس بيهم
ولا زى ما بيقولوا فى الجرايد احد المهمشين
لكن يا جماعة سيد عنده ميزيتين
انه واحنا صغيرين كان بطل اسطورى بالنسبة ليا
كان بطل الشارع لا قول بطل العالم فى لعب البلى
عمر ما واحد عرف يكسب منه بلية واحدة لدرجة انى فى وقت من الاوقات اتخيلت انه حيشارك ضمن البعثة المصرية فى اولمبياد لوس انجلوس 84
كان عليه مسكة بليه ولا ابوتريكة وهو منفرد بالجون
ولما كبرنا وبطلنا بلى استمر سيد فى رياضته المفضلة
وفضل يكسب بلى اكترواكتر
الميزة التانية ان سيد مختل عقليا ايوه
مختل عقليا ودى حقيقة مهمة قوى لمستقبل سيد
لانها بترشحوا للعب دور مهم قوى فى المستقبل
مش بس مستقبله هو لا مستقبل مصر كلها
وترشحه
انه يكون بطل غلاف لجرايدنا القومية خلال وقت قريب
لما يتم اتهامه مثلا بحريق المسرح القومى
ولا اغتيال فلان بيه المهم ولا جريمة فتنة طائفيه
سيد يا جماعة مشروع نجم
لازم كلنا نهتم بيه
فافتكروا ملامحه كويس
طويل اسمر شعره اكرت عينيه دايما معمصة
وايديه بتوصل لركبه وهو ماشى تقريبا ده سر تفوقه فى البلى
حروفه كلها شبه بعض الالف بالظبط شكل البه
يعنى مش حتفهم منه كلمه وده حيسهل عليه قوى الاعتراف بالجريمة
عرفتوا بقى سيد سلائون
البطل الاوليمبى ونجم المستقبل