مكتبي – نص معلقة سكر

  عجوز قوي يا مكتبي ، أكبر مني بحوالي ١٥ سنة يعني معدي الستين مرتاح. مكتبي اللي ذاكرت عليه من أولى اعدادي لحد تالتة ثانوي. المكتب اللي كان سبب خلاف كبير قوي بين أبويا وحماه اللي هو جدي يعني لما بابا بعد ما دفع المهر أصر إن جدي يعمل حسابه في الجهاز على أوضة مكتب. أبويا أستاذ الفيزيا في مدرسة طنطا الثانوية اللي بعد كده بقى أستاذ الفيزيا في كلية التربية ورئيس قسمها كمان ومؤلف كتب الفيزيا لكل اللي درسوا في الثانوية العامة من منتصف التمانينات لحد تقريبا ٢٠١٠ وكمان واضع امتحانات الفيزيا في الثانوية العامة من منتصف التمنينات لحد سنة ٢٠٠٠ ماعدا سنة ٩١ علشان العبد لله. لكن ما علينا، نرجع للمكتب اللي صاحب ابويا من سنة ٥٩ لحد ما قرر يسيبهولي في ٨٦، ٢٧ سنة مصاحب راجل عاشق للعلم والفيزيا والبحث والمذاكرة، وبيتنقل لواحد صايع ضايع بيحب الأدب وبيحط الروايات بين صفحات الكتب. أكيد كان مصاب بصدمة، بس المكاتب عندها وفاء عجيب لأصحابها، بيخدموهم بصدق وينفذوا رغباتهم. مكتبي اللي كان مكتب أبويا ساب كل كتب الفيزيا وبدأ يضم روايات لنجيب محفوظ واحسان عبد القدوس ومجيد طوبيا وقصص ليوسف ادريس ويحي الطاهر عبد الله وبدأ يتحول لمكتبة أدبية. أه نسيت أحكيلكم اني مضيت جوه الدرج الكبير بإسمي قال يعني بسجل للتاريخ. مكتبي اللي شاف أبويا بيقفشني قبل امتحانات الثانوية بكام يوم بقرا رواية اسمها المستنقع وبيضربني هو نفسه اللي شافني بعيط وانا بقبل في الكلية الحربية لأني حسيب البيت للأسف خرج من الخدمة والحياة في ٢٠٢١. المكتب اللي عاش ٦٢ سنة وحصلت حريقة مرة عليه منجاش منها غير المصحف وحشني. وعلشان كده بقوله أكيد أنت في حتة أفضل لكن أكيد مش أحسن من صحبة واحد أدباتي عاش معاك أيام جميلة